អន្តរជាតិ៖ កំណើនសេដ្ឋកិច្ចប្រទេសអាស៊ីទំនងជានឹងយឺតជាងការរំពឹងទុក នេះបើតាមធនាគារអភិវឌ្ឍន៍អាស៊ី ADB បានឱ្យដឹងកាលពីថ្ងៃពុធ។ ADB លើកឡើងថាដោយសារសង្រ្គាមនៅក្នុងប្រទេសអ៊ុយក្រែនត្រូវបានគេរំពឹងថានឹងបង្អាក់ការងើបឡើងវិញនៃសេដ្ឋកិច្ចនៅក្នុងតំបន់ក្រោយវិបត្តិជំងឺរាតត្បាតកូវីដ-១៩។

ក្នុងរបាយការណ៍មួយ ADB ថាសេដ្ឋកិច្ចរួមបញ្ចូលគ្នារបស់ប្លុកនេះដែលរួមមានប្រទេសចិន និងឥណ្ឌា ត្រូវបានព្យាករណ៍ថានឹងកើន ៥,២% នៅឆ្នាំនេះ ធ្លាក់ចុះបន្តិចពីការព្យាករណ៍ ៥,៣% នៅក្នុងខែធ្នូ និងទាបជាងយ៉ាងខ្លាំងធៀបនឹងកំណើន ៦.៩% កាលពីឆ្នាំមុន។

សម្រាប់ឆ្នាំ២០២៣ តំបន់អាស៊ីត្រូវបានព្យាករណ៍ថានឹងកើនឡើង ៥,៣% ។

ADB បាននិយាយនៅក្នុងរបាយការណ៍ទស្សនវិស័យអភិវឌ្ឍន៍អាស៊ីរបស់ខ្លួនថា៖ «ការឈ្លានពានរបស់រុស្ស៊ីលើអ៊ុយក្រែនបានរំខានយ៉ាងខ្លាំងនូវទស្សនវិស័យសម្រាប់ការអភិវឌ្ឍអាស៊ីដែលនៅតែកំពុងប្រឈមនឹងជំងឺកូវីដ-១៩»។

ទីភ្នាក់ងារនេះបាននិយាយថា សេដ្ឋកិច្ចរបស់ប្រទេសចិនប្រហែលជានឹងកើនឡើង ៥% នៅឆ្នាំនេះ ពោលគឺយឺតជាងការព្យាករណ៍នៅខែធ្នូ ។

ឥឡូវនេះ ADB មើលឃើញថា អាស៊ីបូព៌ា និងអាស៊ីអាគ្នេយ៍ កើនឡើង ៤,៧% និង ៤,៩% រៀងគ្នា ជំនួសឱ្យ ៥% និង ៥,១%៕